Ča da van rečen, i mi smo popuštili ovoj napasti od bloga aš danas ku nimaš blog kako da te ni. Z ovin našin blogom ćemo van najavljivati naše buduće akcije ma anke napisati par besid o onemu ča smo delali. Peko će stavljati gori svoju već legendarnu kolumnu Savičenta in the morning a ja ću stavljati slike i video. Forši nan se još ki pridruži kako bi nan blog bija ča zanimljiviji.
Za danas van prežentivan par slik od sinoćnje akcije u oštariji Kod Ferlina. Akcija je bila multimedijalna pak smo imali izložbu, video projekciju, književnu večer i koncert. A neki su igrali anke na harte.
Slike je izlaga Ivica Malčić iz Zagreba a izložba mu se zvala 10 odabranih 2006/7. Preženta je deset slika ke su odabrale mlade kustosice iz Galerije Kraljević u Zagrebu, a prikaza je i video kadi se vidi kako kustosice biraju slike.
Slike Ivice Malčića
S livega na desno: Dobrivoje Keber, Ivica Malčić i Mladen Lučić - Luc
O izložbi je par besid reka povjesničar umjetnosti Mladen Lučić. Izložba se more pogledati do 5. 12. 2008.
Mladi pjesnik Branko Vasiljević iz Pazina nan je preženta svoju poeziju uz razgovor z Marijon Benčićen ki je uključija anke publiku i dava in da čitaju Brankove pjesme.
S livega na desno: Darko Pekica, Branko Vasiljević i Mario Benčić
Večer su začinili kantaduri z okolice Orbanići Slavko Celija i Mauricio Mirković ki su cilu večer kantali istrijanske kante.
Slavko Celija i Mauricio Mirković
Za drugu subotu van moremo najaviti poznatega crtača stripova Igora Kordeja ki će imati svoju izložbu. Dojdite na 6. 12. u oštariju Kod Ferlina u Savičentu, nećete požaliti.
