28 studenoga 2012
Šikuti Makine u Barbanu
Eko, joped niki črv u guzici nan ne da mira, pak bimo malo klatili na okoli. Pok smo
prvi parat lita vižitali Volosko, Kanfanar, Poreč i Novigrad sad smo zvali druga Kontošića ki
je šindako ud Barbana kako bi činili jedan mali đir do mista ki štima prstenac.
Šikuti bi u četrtak večer na dvajset i devet novembra napali i okupirali staru školu u
Barbanu z cilovečernjin programon. Prvo bi prežentali novi libar Darka Pekice Postelja za
četiri, o ken bi rabija govoriti senjor Drago Orlić, kega ne rabi posebi prežentivati.
Živuća legenda ka još hodi po vin prostori, Franci Blašković, bi stešo ima svoj
performans u prilog libra, ki je zibra sedan štorij i uglazbija he, pak je to diventa njigov
osandeseti album, Hommage Darku Pekici i Savičenti in the morning, CD ki je sastavni dio
libra.
Izložit ćemo osam fotografija Andija Bančića Pekine krave u krupnom kadru, kadi se
vidi kako je kravan deboto liplje nego nan.
Elvis Lenić, je činija film o Drugu Frlinu z Vodnjana pak ćete imati priliku u
drugarsken gradu pogledati drugarski film ki dura 45 menuti.
Kadi gredu Šikuti, gre i ništo za u kljun, pak ćemo naj kakov sirić i bakalajić, a i za
popiti će biti, pak vas sve lipo i drago zovemo da nan dojdete dati kuraja, kupite libar za
sedandeset kunic i lipo se zabavite.
Kuraja , Pekica
23 studenoga 2012
Grill peace united-11 lito 5-put
Igor Duda, Iva Gašparić Žiković,
kantaduri palenta
Subota 24.11.2012, oštarija Ferlin
savičenta u 7 z večer
Pokle, ma veramente zaspravlje
sakramenske poeteše Nade Galant, mahera ud dizajna Olega Šurana,
vajk štabelih kantaduri Jože Jurkote i Mate Pucića, vu subotu se
prihićivamo na Puležane. Senjor Igor Duda je po domaću čudo
prirode. Koreni su mu u Žlapani, finija je velike škole u Zagrebu
za mediga ud antike i hrvackega jezika, dela na velikih školah u
Puli stešo za antiku, napisa je dva libra ¨U potrazi za
blagostanjem¨ i ¨Pronađeno blagostanje¨, pomoga je urediti
istrijansku enciklopediju, sad da je kako prvi za to da dopru katedru
u Puli, za vaditi se kako je bilo za vrime Jugoslavije eli u
socijalizmu, i još čud tega, inšoma uno čudo prirode. Ž njin će
Mario Benčić ćakulati o sven ten i još ničen.
Luc Majmajolski bi rabija reći par
besid o izložbi slik ud mlajže umetnice Ive Gašparić Žiković
ke je velike škole za slikati finila u Riki. Već puti su je
premijali za njeje slike i strip. Dela u Muzeju suvremene umjetnosti
Istre u Puli.
Noel bi rabija kantati z kin još ne
zna, a palenta z tripići bi rabila biti za prste polizati, almeno
tako govore kuhari Rino, Šilijo i Klaki.
Alora uvu subotu u 7 z večer ni kamo
ko ne u Savičentu u oštariju poli Ferlina na još jeno šikutsko
malo čudo prirode.
15 studenoga 2012
Grill peace united- 11 lito četrti put
Nada Galant, Oleg Šuran, kantaduri i
palenta
Subota, 17.11.2012. u 19.00 Savičenta
oštarija poli Ferlina
Žito smo posijali, žirje pobrali,
deboto da su i praščine počele, zafriškalo je lipo i ni ča kune
užgati makinu šikutsku i poj ča manorati. Eko nas tako u vu subotu
u oštariji poli Ferlina kadi ćemo imati čast da ugostimo
sakramensku poetešu Nadu Galant z naše drage nan bezačije.
Uozlji, Neka buo, Hćeri Evine, Uroki ruok su zbirke pesam koje je
senjora Nada napisala na trdoj bezačkoj čakavici. Još jedan trdi
ča-Karnevalac Mario Benčić če š njon predikati o jeziku,
poeziji, makaruni, bezačiji, itd.
Za drugi parat grila eli vizuala je
zadužen senjor Oleg Šuran magistar ud novih meidji ki je diplomu
činija u Spiltu na Umjetničkoj akademiji. Ti sakrabojski puležan
je uvega lita na izložbi ¨1112¨ u Muzeju za umjetnost i obrt u
Zagrebu dobija je nagradu Hrvatskog Dizajnerskog Društva za najbolji
dizajn vizualnih komunikacija u profesijonalnoj kategoriji (ti plakat
biti će izložen i još jedan plakat za predstavu Kako je Dunda
spasila domovinu.
Treti parat večeri će regulati
senjor Noel Šuran z svojima kumpanji kantaduri. I zadnji parat eli
gril će biti u žuto. Palenta z ?
Kuraja i do vidova u subotu poli
Ferlina u 7 z večer.
Pekica
Pretplati se na:
Postovi (Atom)