Antika, kantaduri, sir i škuta Subota, Savičenta, 10. marča u sedan z večer poli Ferlina
Šikuti makine pok su počeli z turnejon On the road, da ne bi ufendili domaće pučanstvo su zajno pokle prvega rouda ki je bija pasanu subotu u vološćanskoj Skali napensali tornati doma i prežentati Istarsko povjesno društvo, jenu mladu udarničku brigadu ljudi ki bi sami stili pisati uno ča je bilo i kako je bilo, pak bi nan došla dva Igora, jedan Šaponja i drugi Jovanović, profešuri ud povjesti, ki već nika lita gredu po Istri i kušeljaju z nonićima i nonicami koji su vraga provali po nemačkin logori u Drugoj gveri. Će nan povidati ča su čuli ud njih i pokazati parat ud tega ča su snimili, a bimo stili čuti anke ča z tin pensaju naprid, kako to skoristiti da se ne zabi i kako vaditi dicu po školah da znaju kako je bilo jedan put i zašto je bilo. Pelja da bi he u ten diškoršu senjor stešo profešur ud pasanih vrimeni Mauricio Levak, a kantati će fala bogu naši kantaduri ud antike Noel Šuran z kumpanji.
Gril će biti u šenju OPG Šaci z Krsani, alora sir i škuta, med i lavanda. Do vidova u subotu u sedan z večer poli Ferlina – med, mliko i antika.
Zad nas je i prvo gostovanje ovo lito, i to u Skalinadi u Volosku. Červar nas je smistija u malu konobu zajno do restorana kadi smo se čuli kako da smo doma. Prežentivanje libra je vodila Slavica Mrkić Modrić koja je i napisala lipi članak u Noven Listu pak pročitajte ča je imala za reći a pokle pogledajte i slike:
Darko
Pekica, Postelja za četiri / Andi Bančić, Pekine krave u
krupnom kadru / Šikuti makine, Vogrda
Šikuti
machine su se jeno malo štufali prežentivati narodu to ča drugi
delaju, pak su napensali malo klatiti naokoli i kaživati to ča su
sami činili.
Za prvu on the road da bi pošli poli pretelja Červara u
Volosko kadi je do prija niki dan ima oštariju Skalinadu, a do te
oštarije je činija tipo multimedijalni prostor u ken da bi dela i
izložbe i prezentacije i male svirke itd. Tako bi Šikuti uvu subotu
napali i okupirali to nešto z cilovečernjin programon.
Prvo da bi prežentali novi libar Darka Pekice, Postelja za
četiri. O libru bi rabili govoriti senjora Mirjana Benjak,
dotoreša ud jezika ka je zibrla štorije eli urednica libra, senjor
Maurizio Levak, medig ud antike, ki je iska dlaku u jaju, eli ki je
lektorira štorije a kakovu besidu da bi reka i Marinero, urednik
kulture u Noven listu – senjor Miljenko Marin. Sve to skupa bi
peljalo čudo prirode z unega kraja Učke – Slavica Mrkić Modrić.
U Volosko će z Šikuti doj i Franci Blašković ki će prežentati
80. besidarenje Gori uši Winetoa eli Savičenta in the morning CD
hommage Darku Pekici i njigoven libru Postelja za četiri. Ti CD, ki
je sastavni dio libra, čini sedan štorij z pasanega libra Darka
Pekice.
Šikuti će u isten prostoru projicirati i jedan video ki se zove
Vogrda ki nas torniva u prirodu i kaže kako još je mista pod suncen
kadi je pastoralna idila istinita, a uz to će izložiti i osan
litrati Andija Bančića – Pekine krave u krupnom kadru –
koje se nadoveživaju na video Vogrda.
Bogu fala, će biti ništo i za poisti i za popiti pak vas Šikuti
machine lipo i drago pozivaju da dojdete dati kuraja, kupite libar za
sedandeset kunic i lipo se zabavite.
Alora, subota 3. marča u osan ur zvečera, vrata do Skalinade u
Volosken – libar, litrati, video instalacija i besidarenje –
Šikuti makine.
Kako toka za prvo javljanje u oven litu, magari bi neki reka da kasnimo, želimo Van sve najbolje u noven litu, da Vas prati zdravlje, ljubav, da dobijete delo, povišicu ili ča Vas već kuntenta.
U ovo vrime od fešti san se malo ulinija pak nisan stavija fotke za zadnja tri Grilla ke smo imali ovo pasano lito. Danas san sve pronta ali prije nego počnete gledati slike malo EPP-a:
Kako ća već znate Šikuti Machine su izdali drugi libar našega Peke, Postelja za četiri, u kojoj morete najti skupljeno 166 Pekinih štorija. Ku niste mogli dojti na promociju libar još vajk morete naručiti preko e-maila darko.pekica@inet.hr. Uz libar ćete još dobiti i Francijev CD kadi je uglazbija neke Pekine štorije iz prvega libra i posebni Postelja za četiri označivač za stranice. CD i označivač su u ograničenin količinama pak se levajte. Sve to morete dobiti za 70 kunic.
A sad na Grill. Pokle ča smo promovirali Pekin libar u goste nan je došla Nikolina Ivezić, naša draga gošća. Ovi put nan je dopeljala novu seriju slika/reljefa ke je delala po uzoru na goblene, ma anke jenu seriju kadi je ona sama glavni lik. Kad je zadnji put bila u Savičenti Mario joj je da neki stari okvir a sad mu ga je ona tornala skupa z slikon ku je napravila za njega.
U pauzama su nas zabavljali Noel, Mauricio i Lučano, a pomoga in je i Vinko Zidarić. Mario i Šeki su nan prontali fritaju i ombolo.
Subotu pokle tega smo prvo prežentali novi projekt Marija Benčića, Poezija na kiosku. Na slikama morete viditi kako to izgleda: mladi poete Oleg i Oleg su čitali svoju poeziju na vrhu kioska. Tu istu poeziju se pokle moglo viditi po zidu Oštarije Ferlin.
Pokle tega naš Lenić je napravija savičentinsku premijeru svojega zadnjega filma Drug Ferlin. Ne, to ni film o Mariju nego o Antonu Ferlinu, predsjedniku vodnjanskog Udruženja antifašističkih boraca koji je i aktivni član Šahovskega kluba vodnjan.
Žižović je bija odgovoran za gastro kus pak nan je skuha srdele u ulju, za prste polizati. A za kantu je bija zadužen Noel ki je zabavlja ljude cilu večer sa svojin kantadurima.
I za kraj lita smo prontali izložbu porteta Pekinih krav, ku smo prontali Peko i ja. Ja san krave slika, a on je za svaku kravu napisa besidu ku smo stavili drito na slike. Da se ne moramo sami hvaliti smo zvali Orlića i Marija Benčića ki su to delali za nas. Slike su se mogle anke kupiti ma ni bilo puno onih ki štimaju blago.
Žižović je opet prontiva ribu, ovi put bakalaj, kako se uža na Viliju Bojžu. Ovi put mu je pomoga cili bek stejđ pak su svi pomalo čistili i mišali ti bakalaj. Bilo je toliko bakalaja da su ga rivali prontati na tri foze a Trananaj nan je još pronta i kuhani slanac.
Prema programu tribali su kantati Noel i Ines ma je na kraju došla skoro cila škvadra kantaduri pak je bilo veselu cilu večer.
U oven litu planiramo Grill malo peljati u goste pak ćemo imati malu turneju kadi ćemo prežentati libar, izložbu porteta krav i videoinstalaciju Vogrda, a z nama će hoditi i Noel sa svojon škvadron, a kadi moremo ćemo anke prontivati isti.
Zadovoljstvo nam je pozvati vas na
izložbu – svjetsku premjeru fotografija pod radnim nazivom ¨Pekine
krave u krupnen kadru¨, fotografa, dizajnera, kustosa u Porečken
učilištu, osobenjaka – druga Andija Bančića – Baneta. Ova
njegova izložba se nadovezuje na zadnji video Vogrda – snimajući
krave za katalog izložbe u Novigradu, dobija je inspiraciju i reka
da su mu super te glave ud beštij (krav i junic). Tako smo sad to
zgotovili na dosta veliki format 50/70, napisali beštijami ime i
karakteristike, pa će se to ove subote moći ne samo viti ko ne i
kupiti. Inšoma, bit će aukcija fotografija po početnoj cijeni od
222 kn do maksimalne 333 kn.
Niš manje važno od same izložbe ni
ni kanta kojoj već četrto lito za redon dajemo kuraja, pak će tako
drug Noel Šuran z svojon dragon Ines Drašković kantati i sviriti
sve ča zna i anki uno drugo.
Tu subotu je i vilija ud Božića, pak
ćemo kako ča tradicija nalaže tuči bakalaj u režiji Trananaja i
Žiže starijega.
Alora, ni ča ku ne u subotu poli
Ferlina na bokun bakalaja, kupiti eli viti ča je to Bane činija,
čuti kako lipo kantaju i u nedilju se moremo lipo naspati. Kako ki,
ja moran poj musti krave.
Savičenta, subota 17.12.2011. u 17 na kiosku / u 19 sati u
oštriji poli Ferlina
Ove subote od 17 sati Šikuti
mašin nastavlja s griljatom. Večer započinje novim projektom Marija Benčića:
Poezija na kiosku, u izvedbi Olega & Olega iz Pule. Na kiosku Glasa Istre u
Savičenti bit će upriličeno čitanje poezije „Dva grafičara i pjesnika“.
Šuran i Morović već su znani po
odličnim fanzinima s dobrim i originalnim grafičkim rješenjima i pjesmama nakon
kojih ne ostaje ravnodušnosti. U subotu u pet poklepodne uz njihovu akciju
podsjetiti ćemo se jedne epizode iz života istarskih studenata u Rijeci od
prije više od dvadeset godina kad su na kiosku recitirali Ujevića pa ih
uhapsilo.
Obećao je i stariji Žižović doći.
Mislimo da će najaviti novu knjigu poezije, a spremiti će nam i srdele.
U 19 sati u oštariji poli Ferlina
počet će projekcija filma Elvisa Lenića „Drug Ferlin“. Drug Ferlin je priča o
vodnjanskom umirovljeniku koji razotkriva njegov odnos prema antifašizmu,
idealima, vjeri, prijateljstvu… Poslije projekcije održat će se razgovor s
autorom filma. Naravno sve to uz nezaobilazne kantadure i grill.
U prilogu evo i pjesme, prigodno
jesenske kad je već ispraćamo:
......................... Sve se mijenja 2
jesen je prošla
i svo je lišće palo
više mi nije do eni
sada me je do sare stalo
............................
Alora, pokle ča smo prežentali novi libar Darka Pekice Postelja za četiri, kega jušto za domisliti narod se more kupiti na šanku u oštariji po sedandeset kunic plus kega dobijete zadnji album Francija činut po štorijami Savičente in the morning, Šikuti gredu naprid z delon. Tako ćemo vu subotu imati jedan lipi pominj z purgerskon umetnicon Nikolinon Ivezić, koja da ne dojde samo za ćakulati z našin drugon Lucon Majmajolskin, će donesti i par novih slik ke će za tu večer visiti na zidu.
Naturalmente, kantati će Noel z kumpanji, a bogu fala i ništo će se peći u paršuri. Kako smo žgaji već imamo dogovorenu i drugu subotu kad će Mario Benčić prežentati novi projekt Poezija na kiosku, o ken ćete doznati već na vrime. Tu istu subotu ćemo prežentati i novi film ud Elvisa Lenića Drug Frlin. Una subota u koj dojde biti vilija Božića, će drug Andi Bančić ubisiti jeno deset novih litrati Krave u prven planu. I to bi bilo to za vo lito, a za dalje ćemo još ča to.
