ŠIKUTI MACHINE ON THE ROAD

Pekin libar, Andijevi litrati, Lenićev film
Petak 11.05 2012. u 19.30 Novigrad-Citanova, muzej Lapidarium

Pokle tri on the rouda, šikutska mašina gre naprid i to u nami najdrajži grad Čitanovu, perke je tamo moja najdrajža dotoreša ud jezika ka je uredila libar Postelja za četiri, kega ćemo predstaviti u muzeju senjora Mirjana Benjak. Tamo i naš dobri duh artišta Đanino Božić ki je reka kako da činimo libar, tamo je još i Jerica i Ketrin i Torbica i čud ljudi ke imamo rad. O libru bi rabija govoriti senjor Drago Orlić, kega ne rabi posebi prežentivati plus naturalmente senjora Benjak. Franci Blašković će prežentati svoj osandeseti album Gori usi Winetou eli Hommage Darku Pekici i Savičenti in the morning, CD ki je sastavni dio libra.

Andi Bančić će ubisiti osan fotografij na ken su Pekine krave u krupnom kadru. Prikazati ćemo Lenićev film Drug Ferlin ki nima veze z Šikuti ma smo vajk za dati kuraja drugu, pak vas sve lipo i drago pozivamo da nan dojdete dati kuraja, kupite libar za sedandeset kunic, pogledati Andijeve litrate, Lenićev Film i lipo se zabavite.

Peko

Grill peace united – jedanajsto lito – drugi put

Nikola Petković, Noel i Ines, šparuge

Subota, 5.5.2012, Savičenta, oštarija poli Ferlina u 20 ur

Prija nego zatepli kako tuka da se moremo prihititi u Šikute, ovu subotu ćemo još malo maltretirati Marija Ferlina u njigovoj oštariji.

Zvali smo senjora profešura Nikolu Petkovića sakramenskega čakavskega poetu kemu je doma Bakar, a ni Meriku ni slabo vižita ki je putija študente po raznin američkin sveučilišti, a u Austinu na University of Texas je finta doktorira komparativnu književnost. Dela na filozofsken fakultetu u Riki, lipi broj libri je napisa, ča poežije, ča proze, eseji i studij. Mi da bimo fato rad predikati o libru Uspavanka za mrtve ka je štampana 2007. lita, aš po Franciju da je to kapolavoro za duboki naklon. U pomoć smo zvali i fijumanske pretele z Novega lista pak te Marin Miljenko i Slavica Mrkić Modrić predikati z šenjoron Petkovićen, a forši da bi i Franjo doša reći kakovu tešku besidu o ten štivu.

Noel da će si dopeljati divojku Ines pak da će nas malo znenaditi z kakovon kanton. Gril je zamišljen z šparugami, ma pero ko he ki nabere, ko ne, sama jaja.

Alora uvu subotu u osan z večer oštarija poli Ferlina: senjor poeta Nikola, Marinero, Mrva, Franjo, Noel, Ines, šparuge!

Kuraja,

Pekica

Šikuti na Noć libra

Ponediljak, 23. 4. 2012., 19 ur, Gradska knjižnica Poreč.

Ovi ponediljak ćemo biti gosti u Gradskoj knjižnici Poreč kadi ćemo nastupiti u sklopu programa Noć libra.

Program će biti isti kako i do sada: prežentati ćemo Postelju od četiri, Francijev CD Savičenta in the morning, Vogrdu i Pekine krave u krupnen kadru. Moderator će biti Drago Orlić a s nami će biti i urednica Pekinega libra Mirjana Benjak. Franci će sam prežentati svoj CD.

Bez isti i piti se ne more pak će biti i tega, samo još ne znamo ča.

Ovi naš program će gledati anke iz Sveučilišne knjižnice u Zagrebu aš ćemo se spojiti preko Skajpa.
Dojdite i vi!

ŠIKUTI MAKINE ON THE ROAD – Kanfanar

Jeno malo smo se štufali prežentivati narodu to ča drugi delaju, pak smo napensali
malo klatiti naokoli i kaživati to ča smo mi činili.

Za prvu on the road pošli smo do našega pretelja Červara u Volosko prid petnaest dan,
a vi četrtak bi bili u najbogatijoj našoj susedskoj općini – Kanfanaru.
Šikuti bi u četrtak večer napali i okupirali Dom mladih u Kanfanaru z cilovečernjin
programon. Prvo bi prežentali novi libar Darka Pekice Postelja za četiri, o ken bi rabija
govoriti senjor Drago Orlić, kega ne rabi posebi prežentivati.

Živuća legenda ka još hodi po vin prostori, Franci Blašković, bi stešo ima svoj
performans u prilog libra, ki je zibra sedan štorij i uglazbija he, pak je to diventa njigov
osandeseti album, Hommage Darku Pekici i Savičenti in the morning, CD ki je sastavni dio
libra.

Projicirati će i video ki se zove Vogrda koji nas toniva u prirodu i kaživa da postoji još
misto pod suncem kadi je pastoralna idila istinita.
Izložit će i osam fotografija Andija Bančića Pekine krave u krupnom kadru.

Kadi gredu Šikuti, gre i ništo za u kljun, pak bi prežentali OPG Šaci z Krsani ki delaju
sakramenske prodote ud mlika (sir, skuta) med i lavandu, a i za popiti će biti, pak vas sve
lipo i drago pozivamo da nan dojdete dati kuraja, kupite libar za sedandeset kunic i lipo se
zabavite.

By Peko

Foto album Grillpeace United 10. 3. 2012.

Grill peace united, jedanajsto lito – prvi put

Antika, kantaduri, sir i škuta
Subota, Savičenta, 10. marča u sedan z večer poli Ferlina



Šikuti makine pok su počeli z turnejon On the road, da ne bi ufendili domaće pučanstvo su zajno pokle prvega rouda ki je bija pasanu subotu u vološćanskoj Skali napensali tornati doma i prežentati Istarsko povjesno društvo, jenu mladu udarničku brigadu ljudi ki bi sami stili pisati uno ča je bilo i kako je bilo, pak bi nan došla dva Igora, jedan Šaponja i drugi Jovanović, profešuri ud povjesti, ki već nika lita gredu po Istri i kušeljaju z nonićima i nonicami koji su vraga provali po nemačkin logori u Drugoj gveri. Će nan povidati ča su čuli ud njih i pokazati parat ud tega ča su snimili, a bimo stili čuti anke ča z tin pensaju naprid, kako to skoristiti da se ne zabi i kako vaditi dicu po školah da znaju kako je bilo jedan put i zašto je bilo. Pelja da bi he u ten diškoršu senjor stešo profešur ud pasanih vrimeni Mauricio Levak, a kantati će fala bogu naši kantaduri ud antike Noel Šuran z kumpanji.


Gril će biti u šenju OPG Šaci z Krsani, alora sir i škuta, med i lavanda. Do vidova u subotu u sedan z večer poli Ferlina – med, mliko i antika.


Kuraja,

Pekica

Šikuti u Skalinadi

Zad nas je i prvo gostovanje ovo lito, i to u Skalinadi u Volosku. Červar nas je smistija u malu konobu zajno do restorana kadi smo se čuli kako da smo doma. Prežentivanje libra je vodila Slavica Mrkić Modrić koja je i napisala lipi članak u Noven Listu pak pročitajte ča je imala za reći a pokle pogledajte i slike:

Pekičina "Postelja za četiri" postala "Postelja za prekonekoliko njih"