GRILL PEACE UNITED i IZLOŽBA U ŠIKUTI

Eugene Chadbourne I Noel Šuran

Šikuti, 30.08. 2012. četvrtak u 19.30.

Eko nas joped. Malo je zafriškalo pak se šikutska mašina joped dala na delo. Ovi put ne bude ni subota ni nedilja još manje petak nego četrtak z večer, pak lipo dojdite u Šikute na dozu umetnosti. Sporadi druga Henrija punterskega ćemo imati neponovljivu priliku slušati i gledati to čudo merikansko - genijalca Eugenea Chadburna ki da će sviriti kako ča najbolje zna sam. Čovik da je svirija z svakokovima maheri kako ča su John Zorn, Dead Kennedys, Jimmy Carl Black i čuda drugih. Ko ćete već znati o Eugenu hitite oko na www.ravnododna.com/eugene-chadbourne.

Drugi parat večeri eli prvi ovisi o Lucu Majmajolsken-sakramensken kunsthistoričaru aš ne zna eli će doj na vrime u Šikute, će biti u znaku kož ud ovac eli janci ke je činija lindarski genijalac Noel Šuran-Pletokos. Luc da bi rad govoriti o toj izložbi koju je Noel nazva Genetski crteži a i prilika mu je za najaviti Tote smo 3, veliku umetničku manifestaciju na ovima prostori.

Kako te programe pomoru županija i država će biti ča i za u kljun na ploči.

Kuraja i do vidova, u četrtak u 7 i po z večer u Šikuti.

Pekica

Tko gleda zlo ne misli

Za sve filmoljupce na internetu, Lenić je pokrenuja novi filmski portal u sklopu Kulturistre. Na portalu je za sada par tekstova, ali poznajući Lenića, to će se brzo napuniti. Kategorije su razne: TV i DVD, Kino, Filmska događanja i Filmske novosti. U njima će Lenić pisati recenzije novih i starih filmova, komentare, a popratiti će i friške vijesti iz svita filma i pisati reportaže z filmskih festivali.

Zato nemojte propuštiti pogledati Tko gleda zlo ne misli!

Foto: Emil Knapić i Udav

EMIL KNAPIĆ & UDAV

ŠIKUTI, subota 16.06.2011. u 19.00

Alora vako, kultna galerija u Šikuti dopire i vo lito svoja vrata, to bi bilo dvanajsto lito da nan je drago ugostiti umetnike ud svukud. Čast da prvi vo lito preženta svoje radove će imati senjor Emil Knapić artišta z Valkarina ki će, pokle Pariza, u Šikuti predstaviti par monolitnih skulptur ud želiza ke čine simbiozu istrijanskega težaka i krajolika.

 Glazbeni eli muzički parat će regulati John Lebac prodakšn ki je prvi potpredsednik-savetnik za mužiku u Šikuti. Da ćemo čuti pulski bend UDAV, ki da su po njemu sakramenski i deboto čudo prirode na vin prostori.

 Kako ti naš program Izložbe u Šikuti podržavaju Županija istrijanska i Kulturno ministarstvo RH, ćemo kako i vajk činiti griljatu i kakovu kaplju popiti da ne usušimo ki da će biti lipo teplo.

Kuraja do subote u Šikuti – Knapić z želizi, Udav z noise i griljata.

Pekica

Pokle fjake

Fjaka ne znači da svo to vrime nismo niš delali, samo se meni ni dalo siditi sprid kompjutera i obrađivati fotke. Fjaka je finila a fotke su obrađene. Pogledajte ča smo delali u zadnja dva miseca:

ŠIKUTI MACHINE ON THE ROAD

Pekin libar, Andijevi litrati, Lenićev film
Petak 11.05 2012. u 19.30 Novigrad-Citanova, muzej Lapidarium

Pokle tri on the rouda, šikutska mašina gre naprid i to u nami najdrajži grad Čitanovu, perke je tamo moja najdrajža dotoreša ud jezika ka je uredila libar Postelja za četiri, kega ćemo predstaviti u muzeju senjora Mirjana Benjak. Tamo i naš dobri duh artišta Đanino Božić ki je reka kako da činimo libar, tamo je još i Jerica i Ketrin i Torbica i čud ljudi ke imamo rad. O libru bi rabija govoriti senjor Drago Orlić, kega ne rabi posebi prežentivati plus naturalmente senjora Benjak. Franci Blašković će prežentati svoj osandeseti album Gori usi Winetou eli Hommage Darku Pekici i Savičenti in the morning, CD ki je sastavni dio libra.

Andi Bančić će ubisiti osan fotografij na ken su Pekine krave u krupnom kadru. Prikazati ćemo Lenićev film Drug Ferlin ki nima veze z Šikuti ma smo vajk za dati kuraja drugu, pak vas sve lipo i drago pozivamo da nan dojdete dati kuraja, kupite libar za sedandeset kunic, pogledati Andijeve litrate, Lenićev Film i lipo se zabavite.

Peko

Grill peace united – jedanajsto lito – drugi put

Nikola Petković, Noel i Ines, šparuge

Subota, 5.5.2012, Savičenta, oštarija poli Ferlina u 20 ur

Prija nego zatepli kako tuka da se moremo prihititi u Šikute, ovu subotu ćemo još malo maltretirati Marija Ferlina u njigovoj oštariji.

Zvali smo senjora profešura Nikolu Petkovića sakramenskega čakavskega poetu kemu je doma Bakar, a ni Meriku ni slabo vižita ki je putija študente po raznin američkin sveučilišti, a u Austinu na University of Texas je finta doktorira komparativnu književnost. Dela na filozofsken fakultetu u Riki, lipi broj libri je napisa, ča poežije, ča proze, eseji i studij. Mi da bimo fato rad predikati o libru Uspavanka za mrtve ka je štampana 2007. lita, aš po Franciju da je to kapolavoro za duboki naklon. U pomoć smo zvali i fijumanske pretele z Novega lista pak te Marin Miljenko i Slavica Mrkić Modrić predikati z šenjoron Petkovićen, a forši da bi i Franjo doša reći kakovu tešku besidu o ten štivu.

Noel da će si dopeljati divojku Ines pak da će nas malo znenaditi z kakovon kanton. Gril je zamišljen z šparugami, ma pero ko he ki nabere, ko ne, sama jaja.

Alora uvu subotu u osan z večer oštarija poli Ferlina: senjor poeta Nikola, Marinero, Mrva, Franjo, Noel, Ines, šparuge!

Kuraja,

Pekica